活在當下,劃出精采人生

活在當下,劃出精采人生

郭美德 Joanna Kwok

香港恒生大學企管發展中心總監,專責籌備行政人員課程及企業培訓;擁有豐富市場營銷、公關、管理及培訓行政人員經驗;碩士課程顧問及學生導師,致力培育下一代終身學習。

更多文章

恭喜發才及財!希望豬年為大家帶來嶄新嘅機遇!

在新一年我設定以下五個簡短嘅目標,不知你準備好你個人目標未? 互勉之:

1. 靈命成長,榮神益人,宣揚大愛
2. 生命影響生命,推廣生死教育
3. 健康是福,改變生活,多做運動
4. 與家人過優品生活,多旅遊,認識世界不同事物
5. 不斷學習, 增進中國歷史、金融科技及企業風險管理知識

最近,在機緣巧合之下我和一個朋友分享了一些對人生嘅睇法。而昨日出席盛智文博士係恒大傳理系嘅分享會,當中提到嘅一啲理念亦和我不謀而合, 所以想喺度同大家分享一下。

當我問朋友佢喺人生上面有乜嘢計劃?佢話佢諗住自己唔會好長命,所以完全冇計劃過。我覺得好愕然,我同佢講如果你患咗癌症,你都一定會想喺你最後嘅日子,好好地計劃點樣渡過你嘅人生。其實當我哋將每日看成我哋嘅最後一天,咁樣你先至會好好珍惜你嘅生命,去做一啲你好想做嘅嘢,對生命先至會充滿熱誠幹勁!

我常常比喻人生就像買咗飛去海洋公園一樣,你冇理由入到去乜嘢都唔玩咁就出返嚟,梗係有得玩嘅時候就玩盡佢,最多你有時唞下,有時去下玩機動遊戲,有時睇下水母,海豚,你總會搵到一個你自己最鍾意嘅地方,不枉此行。

盛智文博士亦都提過Steve Jobs以每日係最後一天去作佢人生種種抉擇。情況就係如果明天就係你最後嘅一日, 咁你會點樣決擇你目前最想做嘅事或下一步而無悔呢?而對每一樣事物我哋都應該有一個以初心、充滿驚喜、充滿期待的心情去感受及面對。咁每一樣嘢都會充滿新鮮感,你都會全心全意去做,做得更加好。

可能當年喺第一份工作嘅時候,我就係美國LA遇到地震,當時以為自己好可能會死。腦海中就浮現好多人生想做而仍未做嘅嘢。所以,返到香港首先我係買咗份保險俾家人,更就此改變咗對人生嘅睇法。好好努力活在當下,抓緊生命嘅每一天。生命可以好脆弱,沒有人會知道你明天是否還在世上,抑或回天家,所以目前,我也希望可以努力宣揚福音!

希望係新嘅一年裏面,大家都好好努力計劃一下怎樣去做好自己。啱啱大灣區計劃亦已出爐,我相信我哋作為香港人一定要多些認識中國,多啲返中國了解呢個地方,近水樓台,香港是佔盡先機的,大家坐好列車,一起抓緊我哋未來發展嘅黃金機遇吧!

(聯絡電郵:edcdirector@hsu.edu.hk )

與盛智文博士在恒大傳理系分享會後的合照。

以上內容及資料僅屬個別作者的個人意見,並不代表www.CTgoodjobs.hk的立場。CTgoodjobs對因以上人士張貼之資訊內容所帶來之損失或損害概不負責。

Look out for further updates on our Facebook fan page!