Back to CTgoodjobs.hk
FancyBox


郭美德 Joanna Kwok

恒生管理學院企管發展中心總監,專責籌備行政人員課程及企業培訓;擁有豐富市場營銷、公關、管理及培訓行政人員經驗;碩士課程顧問及學生導師,致力培育下一代終身學習。

想轉行轉工,就要下多D苦功!



同大家分享下當年我由一個專注Marketing 同管理嘅人,搖身一變去咗做公關。 其實就係因為我第一份工嘅老闆非常好學(記住:成功背後都係「終身學習」),當年,佢帶我一齊去上咗人生第一個公關課程。

「公關」究竟係乜嘢,當時都冇乜人知道,普遍都淨係識XX城有公關小姐。而我上完個課程之後,先發覺原來我嘅性格係好適合喺公關行業發展,亦對呢個工種好有興趣。當年我因為唔係讀傳理系出身,所以就將坊間所有開辦嘅公關課程都讀曬,充實自己。但因為我始終冇實際經驗,後來就轉咗去E公關公司做(一間有名嘅危機公關公司)。當時我應徵係做公關主任,幾個月後,老闆就升咗我做客戶總監,冇Agency經驗嘅我才恍然大悟——除咗要有良好公關知識之外,能夠同客戶建立一個密切和諧嘅關係亦係非常重要(擁有經理嘅經驗應該又係叧一個因素)。

回想,我上一手嘅同事就係同個客嗌交,諗起都幾嚇親我㗎。早係讀書時,我曾經係暑假幫招生處做helper ,當年個主任教我哋customer service嘅要訣喺「如果人哋打你左邊面,你要俾埋右邊面佢打」,印象好深!此外,做Agency亦要放膽俾意見個客,不要淨係做Yes man……
係呢一年裏面,我學咗好多嘢,要handle嘅客户包括日本E牌打印機;有做速遞嘅美國U公司;有喺本港做氧氣嘅客戶;有做水晶嘅奧地利S客戶;還有旅遊業界及一些散客。而我亦經歷咗我畢生嘅第一次同埋希望係最後一次嘅公關危機,好彩處理得好,仲俾専欄評為最佳處理嘅公司。後來我仲問老闆:我做完曬D客嘅嘢後,可否自己去搵新客(也許有D工作狂),佢仲話可以分commission俾我添……

反觀今天,好多人工作嘅心態係過一日得一日;夠鐘就放工,唔係話一定要OT先好,而係冇工作責任心,只帶半個腦返工,另一半呢?其實,工作佔人生好大部份時間,依家一般人60歲仍未退休,以一畢業投身工作計算,即最少有40年花在工作上,一定要找份可以燃點你嘅熱誠嘅工作——做Startup也好,打工也好,要找出你嘅興趣及培養出那份衝向成功終點的Passion,好好享受你份工作。咁你先會有熱誠。一起身就想返工,就係敬業樂業嘅道理……

好多人工作嘅心態係過一日得一日;夠鐘就放工,唔係話一定要OT先好,而係冇工作責任心,工作自然唔會做得好。(圖片來源:BillionPhotos.com)

(聯絡電郵:edcdirector@hsmc.edu.hk )


以上內容及資料僅屬個別作者的個人意見,並不代表www.CTgoodjobs.hk的立場。CTgoodjobs對因以上人士張貼之資訊內容所帶來之損失或損害概不負責。



Share