Back to CTgoodjobs.hk
FancyBox


郭美德 Joanna Kwok

恒生管理學院企管發展中心總監,專責籌備行政人員課程及企業培訓;擁有豐富市場營銷、公關、管理及培訓行政人員經驗;碩士課程顧問及學生導師,致力培育下一代終身學習。

揾工要點準備先會成功?



有朋友叫我寫下關於準備求職嘅各種策略,因為佢個仔喺英國讀完書返嚟搵工。講到搵工,呢位年輕人話好灰心,因為send咗成百封信都冇回音,我同佢講呢個係一般fresh grad都會遇到嘅問題,幾十年都係一樣,You are not alone !其實冇回音都係好正常,因為畢業呢段時間太多人同你爭。以香港今日3.1%咁低嘅整體失業率,我肯定只要你肯做,喺香港一定會搵到工,至於幾錢同邊區工作,你先至肯做呢個就係重點所在。

我係早前嘅Blog有提及過,我搵工嘅時候避開咗搵工潮。雖然好多公司會係差唔多時間準備請新嘅畢業生,但個人認為好多公司一年四季都會請人。咁既然你未有任何工作經驗,你揀人,人揀你都係好正常嘅。而要突圍而出可以點做?我以前寄求職信時會用好靚嘅信紙同信封(剛古紙);依家求職通常係online、send email,用唔著呢D。但係cover letter、格式、grammar、spelling,呢啲係唔可以犯嘅低級錯誤。當見到信內有太多錯處,我一定Take OUT呢個applicant。呢D係你自己kill自己,與人無尤!所以我奉勸各位年輕人(其實即使係有經驗嘅求職者都有機會犯呢D毛病),落多D心機打你份求職信,如果連呢份小心同埋誠意都無,就唔好怪人點解唔揀你。點樣sell自己嘅長處同tailor-make每封信,係表現同differentiate自己嘅關鍵,要落足心機,高下立見嘅!

係求職時,首先要揀一啲係自己想做嘅公司或工種,同埋你擅長或以往工作經驗可以配合嘅工。一般年輕人嘅通病就係咩工都申請,係唔係自己想做或者唔理人哋係唔係請有經驗嘅都send去(好多時,我請人時寫明要求要有幾年工作經驗,但都收到好多fresh grad 嘅申請)。咁樣係你自己玩自己啫,冇乜可能會有人咁「慧眼識英雄」,請一個全無經驗嘅人,咁只會加重自己嘅失落感。

而當有人叫你去見工嘅時候,你又應該點樣準備呢?我問朋友個仔仔佢準備點interview。佢忽然同我用普通話示範,我即刻呆咗,問佢做乜?見工時,唔少年輕人會想係僱主面前 show off一下,呢個係一大毛病。我問佢,如果interview你嗰個人唔識普通話點算?年輕人恍然大悟,而且最好等interviewer問你先回答,除較有禮貌外也可聽清楚人家想問你D乜嘢。

當你冇任何工作經驗,靠嘅就係一份誠意。當僱主做請人決定嘅時候,既然全部人都冇經驗,佢唯有再睇下你嘅誠意同工作態度及熱誠:喺學校做咗啲乜嘢、以前喺邊度做過intern/part time、有乜嘢工作經驗、有冇reference letter推薦你,從而估計一下你將來嘅工作表現大概會點。所以我成日都叫我認識嘅年輕人多啲參加學校嘅活動,多啲參加比賽或做intern/exchange student,吸收知識,可以見工時令人刮目相看,亦對青春無悔,千萬不要白白浪費四年大學光陰。

年輕人搵工要清楚知道點樣sell自己嘅長處,differentiate自己,同時亦要小心避免犯上一些求職時嘅通病。(圖片來源:BillionPhotos.com)

(聯絡電郵:edcdirector@hsmc.edu.hk )


以上內容及資料僅屬個別作者的個人意見,並不代表www.CTgoodjobs.hk的立場。CTgoodjobs對因以上人士張貼之資訊內容所帶來之損失或損害概不負責。



Share