Back to CTgoodjobs.hk
FancyBox


郭美德 Joanna Kwok

恒生管理學院企管發展中心總監,專責籌備行政人員課程及企業培訓;擁有豐富市場營銷、公關、管理及培訓行政人員經驗;碩士課程顧問及學生導師,致力培育下一代終身學習。

打工遊世界究竟學到D乜?



上期講開我嘅第一份工喺係一間喺內地主辦展覽會嘅公司度做,而真正改寫我一生嘅就係我老闆不斷畀機會我去出差,帶一班內地嘅高幹去世界各地開會、睇展覽同埋參觀不同嘅機構。

印象最深刻的一次係去法國開會,全日「屈」係酒店Business Center,高幹在吸煙,我在「霧霾」加上jetlag中翻譯、推銷……之後就成班人一齊享受長達2-3小時嘅午餐,再帶他們去巴黎鐵塔(時至今天,我都未上過去,因為永遠都好多人排隊)、羅浮宮……最享受的是自己再留下幾天,咬著法國長包去四圍蕩。之外,我亦要去新加坡參觀一個大型航空展覽兼即場推銷;去英國睇水壩;又去底特律睇車展……底特律那次當時落大雪,穿了件羊毛衫,一到達會場室內,差不多要把身上啲衫除晒,狼狽之極,皆因經驗尚淺!

當時我嘅第一份工作差不多每個月都要出差,令我可以喺好短時間內成長,對之後嘅仕途亦有正面影響。(圖片來源:BillionPhotos.com)

當時差不多每個月都要出差,去勻美加、歐洲、亞洲,走遍全世界嘅大城市。對初出茅蘆嘅我嚟講,絕對係人生中十分難得嘅體驗。而正因為我要帶不同高幹出席不同主題嘅展覽會,全程做足翻譯、保姆、導遊,逼使自己要多方面學習,好快就學識包括冶金、汽車、航空、電力等工業嘅jargons。你可以想像去到一個自己都係初次踏足嘅國家,仲要帶同一班高幹去旅遊,全程要裝作很成熟、識路(這樣人家才會聽你的),當中嘅挑戰有幾大。我從一個嬌滴滴,甚麽都不懂嘅女孩子,變身成為要抬著一大袋裝滿catalogue嘅紅白藍袋,在歐洲火車站抬上抬落都面不改容的刻苦女孩(時至今天,當地都係冇乜電梯)。

而這些經歷令我喺好短日子學咗好多嘢,包括不同國家嘅文化差異及危機處理,(喺出差時曾經遇上畢生第一次嘅七級地震),令我好年輕就深切體會到人生無常,要及時行樂,活得精彩有意義。

其實我曾經諗過拒絕老闆要我出差的要求,因為我聽同事講出差係好辛苦(雖然當年有好多allowance),但好彩我都係一個願意接納多方面意見嘅人,肯聆聽身邊親朋戚友所講,成功把握呢個難得嘅機會,開拓人生另一頁。

如果我哋嘅年輕人唔願意嘗試、唔願意學習、怕辛苦,要喺短短兩、三年由一個trainee升做manager絕對唔易。而我之後嘅路可以有多方面發展,好大部分取決於我呢一份工嘅體驗,同埋開展咗我終生學習嘅第一步。

我想再提醒一下大家嘅就係,唔好怕艱難,亦都唔好淨係聽一、兩個人嘅意見。當你要去發展自己、了解自己嘅潛能嘅時侯,係要喺不同方面去嘗試,要聽不同人嘅意見,再慢慢去搵出自己嘅優點、才華同興趣。人生第一份工作係可以讓你學習得最多嘅地方,因為就算錯咗,你都冇乜損失,最重要係可以令你找出發展方向,有機會去磨練自己、放眼看世界。年輕人,加油啊!

(聯絡電郵:edcdirector@hsmc.edu.hk )


以上內容及資料僅屬個別作者的個人意見,並不代表www.CTgoodjobs.hk的立場。CTgoodjobs對因以上人士張貼之資訊內容所帶來之損失或損害概不負責。



Share