Back to CTgoodjobs.hk
FancyBox


郭美德 Joanna Kwok

恒生管理學院企管發展中心總監,專責籌備行政人員課程及企業培訓;擁有豐富市場營銷、公關、管理及培訓行政人員經驗;碩士課程顧問及學生導師,致力培育下一代終身學習。

如何開展你的第ㄧ份工作才能贏在起跑線?



多謝各位對我早前嘅分享俾咗好多正面嘅反應同鼓勵,促使我再續寫另一篇部落格,同大家分享一下, 選擇第一份工作嘅重要性。

最近我讀咗一篇訪問, 故事嘅主人翁咁啱係我認識嘅年輕人,當日曾於CFA協會共事咗一段短嘅日子。印象中,我覺得佢係一個好乖巧、好勤力嘅小伙子。讀完佢篇訪問,先知道呢個當年嘅十優狀元,原來花咗接近十年嘅時間先至搵到佢自己嘅理想。我覺得有點可惜,人生有幾多個十年呢?當然,我覺得最開心嘅係見到佢依家搵到佢自己最享受、最有滿足感及意義嘅工作。其實,工作嘅收入真係不能完全代表一個人生存嘅真正意義!

當年剛畢業嘅暑假,我去咗一間連鎖快餐店做暑期工,仲打算去埋人生第一次嘅旅行先正式投入工作,但點知黄山瘟疫,最後沒法起行。所以當我真正番工嘅時候已經係八月,比一般人遲。

我知道一般大學生都好緊張搵工,想一畢業就開工,但我反而覺得工作嘅路係好漫長嘅,如果可以避開搵工高峰期反而可能更易搵工。雖然當時我呢份工作嘅人工可能係同級嘅同學入面最低,但我又唔係太介意,因為我覺得最緊要去到一間我自己想去嘅公司工作,做我想做嘅野。

回想當日搵工時,我都曾經去面試做市場推廣員,即係做保險業Sales,但我當年一心只想做Marketing嘅工作,對銷售工作不太有興趣,加上喺學校時已經好鍾意攪展覽會,所以最後就去咗一間喺大陸主辦展覽會嘅公司工作。

喺人生當中,工作嘅路係好漫長嘅,最開心係可以搵到自己最享受、最有滿足感嘅工作。(圖片來源:BillionPhotos.com)

一入職我係由Marketing Trainee 做起,咁即係乜嘢都要做嗰隻:學習收集資料做Brochure,同印刷部同事傾檔期等。我做左大概半年就想離開呢間公司,但係我呢個好精明嘅老闆,每半年就會加我一次人工同埋升我職,令我喺呢間公司做咗一年多就已經係Assistant Sales Manager(唉,原來都係離不開要做sales);再半年後我就已經係Marketing Manager。除了有機會免費出Trip環遊世界,仲很早就成功達到我之前定下五年內升做經理的目標,有同學甚至話我當時嘅人工可能已係全級Top tier。對於一個Fresh Graduate嚟講,呢一份工作確實充滿挑戰,令我畢生難忘、眼界大開,甚至乎係改寫我嘅人生!

我嘅「終生學習」亦係由第一份工作開始,因為我發覺要做好Sales 嘅工作, 就要學習Selling Techniques同埋 Negotiation Skills。「書到用時方恨少」的確係金句,到工作後期我老闆要我管埋IT部門,當年公司仲係用緊 Telex(電報)做Marketing Campaign,部門負責儲存全公司的Data 。其實以前讀書嘅時候我啲IT功課都好多時係抄同學嘅,我從來冇諗過我要做一份同IT有關嘅工作,所以我就即刻又去讀書,學吓點Set Up個Database同埋點樣去改良個System,然後就去管理一班年輕人…… 跟住係點? 下期再續有關呢份工嘅趣事。


以上內容及資料僅屬個別作者的個人意見,並不代表www.CTgoodjobs.hk的立場。CTgoodjobs對因以上人士張貼之資訊內容所帶來之損失或損害概不負責。



Share