Back to CTgoodjobs.hk
FancyBox


郭美德 Joanna Kwok

恒生管理學院企管發展中心總監,專責籌備行政人員課程及企業培訓;擁有豐富市場營銷、公關、管理及培訓行政人員經驗;碩士課程顧問及學生導師,致力培育下一代終身學習。

終身學習,DSE只係起步點



上星期DSE放榜,很多年輕人同埋佢地嘅家長都心情緊張,而我亦係當中嘅ㄧ份子, 感受很深…

回想當年會考,我曾經挫敗。原本英文係坐B望A嘅我,竟然因為大意,冇做到最後一版,只得返個D,加埋ㄧ個B同一個C,入唔返協恩母校讀A- level。兜兜轉轉最後入了浸會當年嘅基礎訓練班 Basic Studies(A-level)。對於一個中學生能享受大專校院生活,咪話唔enjoy,而且眼界大開,後來我就專心咁喺浸會完成我嘅三年大專課程。

當年浸會仲未成為大學,所以畢業只得個高級文憑。但係,當浸會升格大學時,我並無去讀Conversion Program, 而係讀咗個Master Degree – 英國Strathclyde University 嘅MBA。我覺得人應向上、向前望,要對自己有信心。我就算畢業時的GPA不十分高(没甚麽honors),但我自問自己學到的應等同其他Degree Course (當年只有HKU及CU係大學)。既然可報讀Master Degree,為何仲要去讀Conversion,最後讀Master途中仲有Scholarship俾我,匪夷所思。

話說畢業前,我一直以為一出去做嘢,就不用再讀書,好開心。原來呢個先至係人生正式「終身學習」嘅開始。我第一份工因為冇實際工作經驗,連打窿釘 File都唔識,覺得自己作為一個大專生真係好低B。

之後我不斷學習、不斷進修,可以話幾十年嚟差不多無間斷過。喺工作上你要學嘅嘢畀你喺學校多一萬倍,你要做好ㄧ份工作,就要不斷學習。呢個世界每日都喺你意想不到嘅情况吓前進緊,而你學嘅嘢好容易會outdated。去年World Economic Forum發表過一份報告,其實同最近各國 (美國及澳洲) 嘅硏究不約而同,都係話相信十年內,三至四成嘅現有工種會消失,完全由人工智能(AI)取代,問你驚唔驚。

有研究指,十年內高達4成現有工種將被AI取代。(網上圖片)

除非我哋不斷學習、持續進修,否則根本冇可能與世界與時並進。所以我都好慶幸自己做緊嘅工作,有機會參與幫助社會上不同階層/行業嘅人繼續進修。我喺度希望開拓一個平台,有機會同大家互動多啲、了解多啲大家心目中想要學習嘅嘢,幫大家在工作及個人修為上更上ㄧ層樓!

我們要不斷學習、持續進修,與時並進。
(Photograph by Fabrice Coffrini—AFP/Getty Images)

講番DSE嘅成績,係我身邊我看到好多人因為成績失手而傷心。其實當年我嘅成績咁,我都有一秒諗過自殺㗎 – 但咁傻嘅野,又點會做吖。人生咁精彩,世界咁大,明天醒來又一條好漢。其實你依家入到邊一間學校同課程都只係你哋人生嘅一個好細、好細嘅部份。只要有心,ㄧ定有書讀;跌低最緊要識爬番起身;之前瞓咗覺,最繄要識醒…我幾年前教過ㄧ班高级文憑嘅學生,今年好多都已經大學畢業,我好替佢哋開心。依家,讀完大學開始做嘢,就可以繼續進修讀碩士,甚至乎再讀埋個博士,ㄧ個唔夠,可以讀多幾個…亦冇人記得你當年DSE幾多分,甚至邊間大學學士畢業…但當你哋畢業嘅時候,記住「學無止境,達者為先」呢個道理係永恒不變㗎!

下次再同大家分享多啲關於我嘅工作經驗、體會及求職心得。因為呢數十年間我都轉過十多份工作,而喺 World Economic Forum當中亦預測將來嘅人要轉好多份工,而留係每一份工嘅年期都唔會好長時間。原來我都係呢方面一個先驅,我晨早已做咗啦 – 希望你哋都可以有一個高適應力以及能夠接受經常改變嘅心態,以迎接未來變幻莫測嘅挑戰!共勉之!

 

 


以上內容及資料僅屬個別作者的個人意見,並不代表www.CTgoodjobs.hk的立場。CTgoodjobs對因以上人士張貼之資訊內容所帶來之損失或損害概不負責。



Share