Back to CTgoodjobs.hk
FancyBox


HR熊 - 職場航行日誌

人事部工作既小妹,見盡唔少公司既「人」同「事」,係呢個平台上一齊分享職場上既苦與樂,笑與淚。

功高蓋主易中伏



新鮮人最容易既出事位,就係高功蓋主然後瞬間不明不白地失寵。小熊唔希望形容為總係會犯既錯誤,原因係職場上既白紙一定會亂衝亂撞,肯去表達見解想用行動証明自己的工作表現,其實先可以成長得最快。

「阿明,歡迎你加入我地IT部門,我地又多左一個中大師弟啦!」乍看來同事們個個笑意盈盈,阿明不以為意,心裡暗喜自己入到一個親切又和善既地方工作。本身除左程式編製出色之外,阿明外型有書卷氣得黎有朝氣,要得到老闆歡心睇怕唔難。故事就係順延住咁既形勢發展,阿明因為新入職,作為老海鮮既senior同事,當然不停給予機會阿明接觸多啲唔同類型既工作,口就話會傍實佢,實際上當然係將煩厭既report和要同其他部門溝通既大量email工作交托左俾佢,呢類工作都有足template俾佢慢慢follow,唔太擔心佢會出大錯。

有時候,真正既機會就係咁樣得返黎,senior懶懶閒,阿明充滿幹勁,塞幾多工作俾佢都欣然接受。佢明白自己現階段係最底層既一個,無say既時候佢選擇要做得更出眾,想大家盡快將佢睇高一線。直到最近一次既公司活動,最後總有一個環節係歡迎各部門既新同事,會搵其中一兩位「講幾句」,個個都害羞地你推我讓,將咪高峰推到阿明手上時,佢青澀的瞼望望鏡頭然後接著開口,官仔骨骨同大家say句hello,禮貌地介紹自己係邊個部門既新同事,對公司願景既期望和希望下一次場合再見到大家。答得落落大方,相信唔少女高層對佢發放心心眼,會用心記住佢。

「今次開會想交代番黎緊又係部門一年一度既重點project……」,阿明既上司Winson,大家尊稱「Win神哥」,三年前開始,呢個重點項目已經係交俾佢單人匹馬負責,正當佢想起身開口之際,同事急急講:「今年project上有少少新安排,會係由新同事阿明負責聯絡各單位和文件上既往來,而「Win神哥」就幫手監管整個project進度,有「Win神哥」睇住,一定可以繼續做出出好成績!如果有任何需要大家請幫幫忙,我地要爭取department award啊!」

阿明,突然心驚膽跳;
Win神哥,忽然個心離一離,

然後,兩人充滿疑惑互相對視左一眼。

Win神哥有感風頭被搶,新人有咩資格係老闆睇重既重點項目立足?監督住佢做野嘛,好,我一定做足。

可憐阿明仲未聞到燶味,惡夢逼近了……

當阿明聽到自己有份跟進時,好驚喜但飄過一絲困惑,工作經驗不足既佢捉摸唔到點解有咁既感覺所以唔理會了,只顧任由興奮感覺發酵,好雀躍咁希望盡快開始新task!第二日返到office,阿明就主動問Win神哥佢需要幫手做啲咩,一定盡全力去做。有啲說話真係唔好亂講,好易觸動到某啲人既敏感神經架!Win神哥先指示佢不如翻閱上三年project資料打打底先,聽起黎好合理,阿明好心急衝左入檔案室搵資料,鋪晒塵唔在講,啲資料跟本無一個次序放好,究竟由邊度開始睇先岩呢?但阿明唔想每事問俾人感覺好蠢鈍咁,索性睇晒佢實無執輸。捧住厚甸甸既file返座位逐頁逐頁睇,好努力mark筆記。直到Win神哥空閒時,佢問阿明不如開始睇資料,阿明加班左幾日刨晒所有數據同資料,當然等唔切表示做好晒功課。Win神哥顯露驚訝樣,故意調高聲調扮作好奇地問,「點解你唔問清楚我先去做啊?我五分鐘前直接send左資料俾你study,你而家手頭上係房入面個啲資料嗎?係上個世紀架啦,你無留意個date都算啦,甩甩漏漏唔齊全架喎,你真係睇得明咩?」幾句話足以令阿明晴天霹靂,俾上司責怪,皮薄既佢覺得無面到想當場大叫,加班左幾日既辛勞原來白費,而且……而且Win神哥不時會經過佢座位,應該一早發現佢睇緊錯資料,點解唔出聲?唔通……就係為左呢一刻?

老闆開完會,番黎撞正阿明起身想去影印,一般同事會係簡單打個招呼,阿明一樣恭敬地打招呼,然後不自覺感謝老闆俾機會佢跟大project,愈講愈多幾乎變閒談。Win神哥去完洗手間番黎時見到呢一幕,臉色一沉!徑自走過去插嘴,並叫阿明先返埋位趕埋封email先。對話打斷左,老闆無得對小鮮肉多一陣,有啲悔氣走左。Win神哥有感係阿明從中作梗,做多餘事搞到老闆對佢印象唔好,又方丈上身。

如是者,前期功夫每日阿明都委屈地受上司氣,所謂聯絡各單位,原來不過係準備聯絡名單和草擬email,Win神哥就將email有一個無一個咁CC俾佢,似乎刻意令佢搞唔清成個程序,其他部門既同事亦唔為意阿明係有份involve,配角想係老海鮮眼下發圍,仲有好遠好遠路。

或者係有啲唔抵,少少無辜。現實會提醒你上司總係要高你一段距離,你向前衝時可能會無心衝撞到佢既玻璃心,緊記將佢先放第一位,係你仲需要依靠佢既時候。阿明好沮喪,但多多少少get到職場既複雜,早早中一次自己設既伏,或者對佢整個職場人生係好事。


以上內容及資料僅屬個別作者的個人意見,並不代表www.CTgoodjobs.hk的立場。CTgoodjobs對因以上人士張貼之資訊內容所帶來之損失或損害概不負責。



Share