Back to CTgoodjobs.hk
FancyBox


HR熊 - 職場航行日誌

人事部工作既小妹,見盡唔少公司既「人」同「事」,係呢個平台上一齊分享職場上既苦與樂,笑與淚。

你有天生做HR既才能嗎?



首先你要有出色既執生、馴獸和製造氣氛能力,對人既工作可以話係日日都有你想像唔到既新挑戰,猶如公司內部既專業顧客服務員。

HR崗位可以分做inhouse或者對外既,你問我做邊一樣會舒服啲,我只能冷笑一聲,周旋係老闆、部門主管和客戶之間,兩樣都需要充足既耐力。香港HR既工作大致分為人才招聘、薪酬管理和員工培訓三大類,先講人才招聘方面,我地要好明確掌握到所負責招聘職位既市場動向,係筆直限制下搵到一個渠道收集到最多最岩用既CV,軟硬兼施逼問清楚部門主管要請具備咩特質既員工,因為好多時佢地無咩意見,話隨便搵個識做野既人就可以,咁我點寫落job requirement呢?要既係客觀、具體既keywords!

唔單止係網上登招聘廣告,根據各職位對邊一種媒體接觸度最高,會張貼廣告係報章雜誌或者舉辦大小型既招聘日。自從有最低工資後,低技術既工種愈黎愈難請人,唔想打價格戰,價高者得對市場長遠發展根本唔健康,所以係招聘日見到合適既求職者時,HR就化身為top sales,落足嘴頭,用最少時間俾到佢想獲得既資訊令佢知道我地公司既競爭力和優勢。

小熊最唔擅長計算薪酬福利,一見到洶湧不絕既數字就開始頭痛。如果公司有大量唔同類型既員工,包括月薪、日薪、件薪和兼職既員工等等,而跟據佢地各自既入職時間,薪酬待遇會係大不同,一到月尾酷刑就黎啦!由頭到尾仔細檢查一次每一位員工黎緊出糧既數目係咪正確,費盡心神去核對每張人手寫既timesheet或者拍卡機紀錄,唔好考究點解仲有大公司會咁落後,只需要做好心理準備有機會做同樣既工作。

唔只每個月,每年仲要大規模review員工既薪酬福利架構,需要點樣微調去平衡番公司和同事利益。事前可能要邀請所有同事填問卷做一個全面既統計,加上參考番同離職同事做exit interview時要旁敲側擊知道係唔係因為薪酬既原因被跳槽挖角。不論公司選擇酌量按比例加薪,或者逼不得已要裁減人手,我地必須配合公司決策,演好公關角色,吹噓公司依然不比下去既競爭力,包裝得美侖美奐。

對於挽留人才,我地就要定時安排專業講座和培訓,job rotation去激勵士氣,提供條件令大家更加為公司無悔去賣命,賣命得更到位。而公司難得大方花金錢和人力去搞training,HR就要一力包辦老闆們既面子,又有一連串痛苦既工作開始!最擔心係咩呢?就係專登邀請高層紆尊降貴黎做場俾面talk,但黎觀摩既同事竟然寥寥可數,真係醜死怪啦,你話咁既場面到時仲繼唔繼續落去好?係咪佢本身既號召力唔夠?當然唔係啦,係我地宣傳不足,好多同事reach唔到呢個活動資訊先至無出席,一定係咁架!

作為公司內部出眾既專業顧客服務員,係時候發揮強項啦!預先聯絡各位相熟秘書姐姐,幫忙散一散消息俾佢地老闆,請佢地傾好當日搵邊班同事去撐場,我地計定每個部門至少有一定數量同事去,安排好晒座位就無有怕啦。預好左人數,就要去規劃成個活動流程,不過淡定,通常有大把以往既sample跟住做,大同小異架姐,老闆仲緊張過我地呢班小薯仔,佢地既意見滔滔不絕,想搞到好盛大好grand,反而好考HR既馴獸技巧,要係適當時機捉到老闆既喜好而預計埋自己既能力,一邊監察住佢地既微細表情有無任何不滿而提出最合適既方案。

一口氣分享左幾個大主題,有無嚇怕左你?抑或你信心爆晒棚覺得係「依絲執」呢?


以上內容及資料僅屬個別作者的個人意見,並不代表www.CTgoodjobs.hk的立場。CTgoodjobs對因以上人士張貼之資訊內容所帶來之損失或損害概不負責。



Share