Back to CTgoodjobs.hk
FancyBox


HR熊 - 職場航行日誌

人事部工作既小妹,見盡唔少公司既「人」同「事」,係呢個平台上一齊分享職場上既苦與樂,笑與淚。

好人難做,和善既HR更難做



對於HR既誤解應該唔需要多講,大家都會認為一間公司入面既HR部門根本係可有可無兼且係萬惡既角色。我地作為中間人去處理各種事務和活動,太過唔得同事既歡心對工作係只有負面既影響,我地唔係為左挑剔和製造是非而存在,好想俾個全新既印象周遭與我地有合作既同事見到。係香港既工作環境入面,好人的確難做。大部分打工仔心態都係事不關己己不勞心,準時放工和有糧出就可以了。HR係好定壞,邊個會關心?

唔排除的確有啲守舊既HR會係擺起姿態,板起臉孔去回答同事既所有查詢,不過年青一代已經好少再有咁既情況。如果係屬於「一條龍」服務既HR,即係所有有關HR既查詢或問題都只有一個負責同事一手一腳去處理既話,其實工作量相當沉重。除左量多,回應速度亦唔可以怠慢,否則永遠做唔完。小熊正正就係擔當緊呢個角色,要處理既頊碎事項有好多,但都時刻提醒自己唔可以因為做得累而態度惡劣。

純粹只想係人前做一個好人,等於虐待自己。

好多人會用盡你既善心,明知你會為左保持形象而唔敢拒絕,就會得寸進尺去試探你。HR的確掌握晒同事們既個人資料和面試安排,唔少人覺得你友善,就會開始借啲藉口想由你把口講多啲內幕消息。最常見就係問有邊啲內部員工被邀請去面試,透露下考官評價係點,邊個最大機會成功等等,如果我地做HR唔夠口密,以為賣個人情俾部門高層,點知好快傳開左消息,到時問責起上黎受罪只有自己。又有時同事唔熟悉公司政策,想知道點樣預支假期,申請各式各樣既津貼和辭職程序等等,你以為好心快手send埋表格俾佢填,唔想刻意請佢地send request黎先回覆,就好易中招。因為無前言睇得返,同事真係可以話係你send錯表格,HR胡亂email要求佢地填好附上表格。始終係對人既工作,態度上可以表現得友善啲,不過公事依然要公辦。

做左幾年HR,久而久之練成職業病,係公司隨時一拎起電話或者有同事直接黎搵自己,好自然就會係臉上堆砌笑容,真心?假意?我都分唔清,亦唔重要,如果可以令對方感覺HR一向俾人既殺傷力係減低左,已經係成功改變HR形象既開始。

做好人之前首先要識得諗多一步保護自己,劃清楚底線,先會得到你想要既效果。


以上內容及資料僅屬個別作者的個人意見,並不代表www.CTgoodjobs.hk的立場。CTgoodjobs對因以上人士張貼之資訊內容所帶來之損失或損害概不負責。



Share