Back to CTgoodjobs.hk
FancyBox


全職獵人FullTime Headhunter

一個中環Headhunter,遊走於各大企業、不停挖角。澳洲回流,全職獵頭,兼職旅人。風流不下流,靠把口搵食。純粹分享每日光怪陸離、有血有淚的獵頭生活。

我獵頭生涯的第一個Placement:古天樂(上)



我有一個盒,一個放滿感謝信同照片的一個盒,早前家中大掃除嘅時候,我打開這個盒看看之前和Candidate的合照,重新再讀一次他們寫給我的感謝信。在盒子的底部,我找到一張開始褪色的寶麗來照片,一張我和阿基的合照,阿基,係我獵頭生涯入邊第一個Placement。望住張照片,種種回憶慢慢浮現出來。

2011年,久保加入第一間獵頭公司,cover嘅areas比較廣,如果我同你哋講我第一年就開始做CEO Recruitment你哋都唔信啦!清楚記得當時上司指派我去跟進一間港資上市公司,客戶想請一個私人司機直接服侍主席。搵私人司機話難唔難話易唔易,上司Brief咗我呢份工嘅要求之後,我就開始登Ad、用公司Database去搵合適Candidate,隔咗幾日之後連一份Resume都沒有,當時年少氣盛嘅我完完全全輕視了呢個role,終於比上司同客戶捽,要我十日之內交到人。時間緊迫,加上上司又去咗旅行,所以最後決定膽粗粗自己打俾客戶,嘗試問清楚個Role有乜實際要求,因為唔想提供一個唔適合嘅人俾客戶,我打俾主席嘅私人助理兼HR,Rosanne。當中短短幾分鐘嘅對話,相隔七年,仍然印象深刻。

久保:你好啊!Rosanne,我係X公司𠴱邊打嚟㗎!我叫久保,我係負責幫貴公司請私人司機𠴱位Recruitment Consultant。請問你宜家有冇十分鐘同我傾幾句關於個Role?我想問清楚少少,可以令到我更加精準咁樣幫你搵到合適嘅人選。

Rosanne:久保係咪呀?首先我同你唔係好熟,麻煩叫返我做陳小姐;第二,我啲時間好寶貴嘅,我哋出錢叫你幫我哋搵人就係叫你幫我哋去解決問題,而唔係我浪費時間幫你去解決你嘅問題,不過見你咁有禮貌,把聲又幾好聽,我決定俾5分鐘你。

久保:多謝您呀!陳小姐。其實我想問吓對於私人司機依個position,請問您可唔可以講多次您嘅要求?我上司其實同我講過嘅,但係我驚有甩漏,所以我想問多您一次。

Rosanne:唉!我當時都覺得你上司真係廢㗎啦,問啲唔問啲。睇吓!而家你又要打多次過嚟問返我相同嘅問題!好!我再講多最後一次,麻煩你聽清楚,我時間好寶貴,同埋我好憎重複講同一篇說話。

久保:係嘅陳小姐。其實係我當日聽漏咗我上司講嘅嘢啫。對唔住引起你嘅不便。

Rosanne:Whatever!其實呢個司機除左對住我哋主席之外大部份時間都係我用佢嘅。你知我做主席私人助理平時有幾忙㗎啦。主席又成日出差,雖然有其他私人助理陪佢出差,但係我都要留守香港幫佢睇住成盤生意。你知啦,我一個女人仔又高又瘦又有幾分姿色,其實有時出街都幾危險。所以其實我想請一個私人司機係可以做埋我私人助手兼保鑣嘅。我嘅要求好簡單。

久保:請問陳小姐有咩特別要求?

Rosanne:我想請一個古天樂返嚟服侍我。吖,唔係,幫我哋揸車。

久保:古天樂?

待續。


以上內容及資料僅屬個別作者的個人意見,並不代表www.CTgoodjobs.hk的立場。CTgoodjobs對因以上人士張貼之資訊內容所帶來之損失或損害概不負責。



Share